Áššehasmávssu mearrahuvvan
Fuolaheaddjit ilmmuhit iežaset dietnasiid ja daid nuppástusaid árrabajásgeassima rehketčállimii dienasčilgenskoviin. Dienasčilgenskovvi galgá doaimmahuvvot vuosttaš mánu áigge. Juos dienasdieđut eai doaimmahuvvo, berrojuvvo alimus árrabajásgeassinmáksu. Mearridettiin mánáid árrabajásgeassima mávssus, váldojuvvo bearraša dienasin vuhtii bálvalusa geavaheaddji ja suinna oktasašdállodoalus náittoslihtus dehe náittoslihttolágan dilis ealli olbmo vearuhuslaš dienas- ja kapitálaboađut sihke vearrofriddja dietnasat. Juos mánnosaš dietnasat rievddadallet, mánnosaš dienasin váldojuvvo vuhtii maŋemus jagi gaskamearálaš mánnosaš dienas. Vearuvuloš dienasin sáhttet váldojuvvot vuhtii maiddái maŋimus doaimmahuvvon vearuhusas váfistuvvon danveardásaš vearuvuloš dietnasat bajiduvvon daiguin proseantameriiguin, maid vearroráđđehus jahkásaččat addin mearrádusainis ovdavearu rehkenastinákkain mearrida.
Boazodietnasiid čuovusin doaimmahuvvo mearrádus ealliguovdasaš doarjagis sihke boazodoalu boađusrehkenastin.
Dienasin eai váldojuvvo vuhtii mánáidruhta, lápmásiidovdduin addojuvvon lága (570/2007) mieldásaš ovdu, álbmotealáhatlága (568/2007) mieldásaš mánnábajádus, orrundoarjja, buohccedikšun- ja dutkangolut bártedáhkádusa vuođul, soalddátdoarjja, rattušlasáhus, oahpporuhta, rávesolbmuidskuvlendoarjja, oahppodoarjaga orrunlasáhus, doaibmaruhta ja mátkebuhtadusat, mat máksojuvvojit birgenláhkedoarjjan, Álbmotealáhatlágádusa veajuiduhttinovdduin ja veajuiduhttinruhtaovdduin addojuvvon lága (566/2005) mieldásaš bajásdoallanbuhtadus, almmolaš bargovuoibmebálvalusas addojuvvon lága (1295/2002) mieldásaš bajásdoallanbuhtadus, oahpuid geažil ožžojuvvon veahkkeruđat ja eará danveardásaš doarjagat, bearašdikšuma goluid buhtadusat iige mánáid ruovttudikšundoarjja. (11.5.2007/585)
Dietnasiid geahpádussan váldojuvvojit vuhtii máksojuvvon ealihandoarjagat ja duođalaš bearašgaskavuođain boahtán eará dávisteaddji golut sihke giddodaga luobaheami oktavuođas mearreáigái dehe eallinbadjái dollojuvvon ruhtan máksojuvvon ovdu.
Árrabajásgeassinmáksu merrojuvvo dan máksináigemuttu dili dávisteaddjin juogo gávnnahuvvon goluid dehe árvvoštallojuvvon dietnasiid vuođul.