Ovdaoahpahus

Doaibma vuođđuduvvá riikkaviidosaš ovdaoahpahusplána ákkaide ja báikkálaš ovdaoahpahusa oahppoplánii. Ovdaoahpahus fállojuvvo Eanodaga gielddas Heahtá vuođđoskuvllas, Gilbbesjávrre skuvllas ja Gárasavvona skuvllas. Du mánná sáhttá oažžut oahpahusa juogo suoma- dehe davvisámegillii fuolaheaddji válljema mielde. Oahpahus joatkahuvvá automáhtalaččat du válljen gielain sirdásettiin vuođđooahpahussii. Du bearraša ja ovdaoahpahusbáikki gaskavuođa oktavuohtadoallamis geavahuvvo elektrovnnalaš vuogádat Wilma.

Oaččut skuvllas boastta mielde skovi giđđat, mainna dieđihat iežat máná ovdaoahpahussii. Seammas ilmmuhat háliidatgo iežat mánnái oahpahusa suoma- vai sámegillii. Dieđihemiid maŋŋel skuvla ordne oahpásnuvvanbeaivvi ja diehtojuohkindilálašvuođa fuolaheddjiide miessemánu áigge.

Ovdaoahpahus lea nuvttá oahpahus, man mánát ožžot oahppogeatnegasvuođa ovddit jagi beaiveruovttus dehe skuvllas. Ovdaoahpahus ordnejuvvo maiddái priváhta árrabajásgeassimis.

Ovdaoahpahusahkásaččat dehege 6-jahkásaččat oassálastet ovdaoahpahussii. Ovdaoahpahussii oassálastet maid dat 7-jahkásaččat, geaid skuvlavázzima álgin lea maŋiduvvon. Dasa sáhttet searvat dat 5-jahkásaččat, geaidda lea dahkkojuvvon mearrádus guhkiduvvon oahpahusgeatnegasvuođas.

Mánát ožžot ovdaoahpahusa iđđesbeivviid njeallje diimmu beaivvis. Mánát ožžot dalle maid beaiveborramuša.

Juos ovdaoahpahusa oahppis dihtto doarjaga dárbu, lea sus riekti iežas dárbbahan veahkkebálvalusaide ja veahkkeneavvuide.

Ovdaoahpahussii oassálastin lea vuođđooahpahuslága mielde geatnegahtti. Máná fuolaheaddjis lea ovddasvástádus das, ahte mánná searvá ovdaoahpahussii dehe dan ulbmiliid joksi doibmii oahppogeatnegasvuođa álgima ovddit lohkanjagi.